Gwamnatin Jihar Yobe ta yi baje-kolin ɗimbin damammakin da jihar ke da su a wajen jawo hankalin masu zuba jari daga sassan duniya, musamman a fannonin ƙaro da ridi da sauran kayan amfanin gona, a yayin taron Majalisar Ɗinkin Duniya na shekarar 2026 (UNGA) da ke gudana a birnin New York na Amurka.
A wata sanarwa da Mamman Mohammed Daraktan Yaɗa Labarai da Hulɗa da Manema Labarai na Gwamna Mai Mala Buni, ya fitar a Damaturu a ranar Laraba ce ta bayyana hakan.
Gwamna Mai Mala Buni ne ya jagoranci shirin, inda ya gabatar da Ajandar Zuba Jari da Ci Gaban Jihar Yobe a taron, da nufin samar da dabarun haɗin gwiwa, damar zuba jari daga ƙasashen duniya da kuma bunƙasa jihar.
Wakilin Gwamnan, wanda shi ne Sakataren Gwamnatin Jihar (SSG), Dakta Mohammed Goje, ya bayyana cewa sauran fannonin da ke da babbar damar zuba jari a jihar sun haɗa da makamashi, haƙar ma’adinai, kiwon lafiya da shirye-shiryen bunƙasa matasa.
Gwamna Buni ya ce: “Wannan wata dama ce ta baje kolin albarkatun ƙasa na Yobe, muhimmiyar matsayinta na ƙasa da kuma yawan matasanta, tare da mayar da su damammaki masu amfani da za su samar da ayyukan yi da kuma ci gaba mai ɗorewa, wanda zai bunƙasa muradun Yobe ta hanyar hulɗa da ƙasashen duniya.”
