Mamallakin Matatar Man Dangote, Alhaji Aliko Dangote zai raba hannun jarin matatar da ya ƙaddamar, mai suna IPO, kyauta ga mata miliyan biyu da mazajensu su ka rasu.
Shugaban Ƙungiyar Tuntuɓa ta Arewa, wato Arewa Consultative Forum, ACF, reshen jihar Kano, Goni Farouk Umar ne ya baiyana hakan a wajen taron wayar da kan jama’ar jihar akan alfanon hannun jari, wanda ya gudana a yau Asabar a shelkwatar kungiyar a Kano.
Gwani Umar Farouk
A cewar Goni Umar, Dangote zai raba kyautar hannun jari ne ga matan da suka rasa mazajen su, musamman a jihohin Borno, Adamawa, Yobe, Katsina, Zamfara da Sokoto da sauran su.
Ya kara da cewa wannan tagomashi zai taimaka matuka wajen bunƙasa tattalin arzikin jihohin, musamman waɗanda su ke fama da aiyukan ƴan ta’adda.
Hakazalika a yayin taron, Goni Umar ya baiyana cewa zai saya wa abokan karatun sa na Makarantar Rumfa, mutane 60 hannun jarin, inda a yau din ma da dama su ka zo aka dauki bayanan su.
Haka kuma kungiyar ta ACF ta allafawa mutane wajen taimaka musu wajen siyan hannun jarin tare da buɗe musu asusun ajiya na banki da zai basu damar siyan hannun jarin.
Some of the beneficiaries being registered.
Da ya ke jawabi, Umar ya ce sun zakulo masu ƙaramin karfi a cikin al’umma domin taimaka musu wajen mallakar hannun jarin na Dangote, inda ya bayyana cewa dama can ƙungiyar na tallafawa mabukata a lokuta daban-daban.
Ya kara da cewa kamar yadda Dangote ya kira suna hannun jari da cewa hannun jari ne na al’umma, wannan dalili ne ya sa ACF a Kano ta ga dacewar sayawa masu ƙaramin ƙarfi domin su amfana.
Goni Umar ya kuma musanta zargin da wasu ke yi na cewa ba za a samu riba daga hannun jarin na Dangote ba, inda ya zayyano ribar da kamfanin ya samu a fannin siminti da sukari da ita kanta matatar man.
